ماتھے پر ٹیکا لگانااور مندرمیں نکاح کرنا جائز ہے یانہیں 

زید ایک امیر شخص ہے جس کی ذاتی جائداد کے علاوہ موروثی جائداد بھی ہے اور مزید آمدنی کے وسائل بھی ہیں ۔ زید کو ایک لڑکا اور دو لڑکیاں ہیں ۔ دونوں لڑکیاں شادی شدہ ہیں اور اپنے شوہر وںکے ساتھ علاحدہ مقیم ہیں ۔ لڑکا جدید تعلیم وفنون سے آراستہ ہے اور عمر تقریباً اٹھائیس سال ہے، والدین کی مرضی کے خلاف کسی کافرہ لڑکی سے رشتہ جوڑے ہوئے ہے ۔ والدین نے بہت سمجھایا بجھایا ، نرمی اور سختی سے کام لیا ۔ اس کے باوجود وہ اسی کافرہ سے شادی کرنا چاہا تووالدین نے تنبیہ کی کہ اگر وہ اس کافرہ سے شادی کرے گا تو عاق کردیا جائے گا، اورجائداد سے اس کو کچھ نہ دیا جائے گا۔ اس کے باوجود زید گھر چھوڑ کرچلا گیا اور کافرہ سے رجسٹر شادی رچایا اور پھر بعد میں کسی بت کدہ میں جاکر کافرانہ رسوم اداکیے اور شادی کرلی۔ شریعت کے مطابق نکاح نہیں ہوا ، دونوں ماتھے پر ٹیکا بھی لگائے ہوئے ہیں۔ کیا ایسا شخص شریعت کے مطابق اپنے والدین سے حقِ ولدیت کھوچکا ؟۔ کیا موروثی جائداد جو کہ ایک قدیم عمارت تھی ، جسے ڈھادیا گیا تھااور بعد میں کثیر رقم بطور قرضہ لے کر جدید عمارت تعمیر کی گئی ہے اور اس سے کافی آمدنی ہورہی ہے، اس میراثی جائیداد میں سے اس لڑکے کو کوئی حصہ ملے گا ؟۔ از راہِ نوازش اس کا جواب فتویٰ کی شکل میں دے کر ممنون و مشکور فرمائیں۔بینواتوجروا(فتویٰ نمبر ۶۵؍۱۴۱۹ھ)