مسجد کے سیلر میں خواتین کے اصلاحی بیان میں شرکت کا حکم

کیا فرماتے ہیں علماءِ دین و مفتیانِ شرع متین مسئلہ ذیل کے بارے میں کہ ہماری مسجد کے سیلر (تہہ خانہ) میں مستورات کے لیے معقول پردے کےساتھ ماہانہ ایک مرتبہ علماء کرام کا اصلاحی خطاب ہوتا ہے، مسجد کے بانی اور ذمہ دارانِ مسجد کا کہنا ہے کہ ہم نے مسجد کا تہہ خانہ (سیلر) گاڑیوں کی پارکنگ او ر جنازے کی نماز کے لیے بنایا ہے، جب کہ جمعہ میں اور کبھی ضرورت پڑنے پر لوگوں کی تعداد زیادہ ہونے کی بنا پر سیلر میں بھی نماز ہوتی ہے۔ تو کیا اس سیلر میں جو مسجد کا گراؤنڈ فلور ہے، مہینے میں ایک مرتبہ مستورات پاکی کی حالت میں اصلاحی خطاب سننے کے لیے مسجد آسکتی ہیں ؟۔اور وہ جن مستورات کو شرعی عذر کی وجہ سے نماز نہیں ہوتی، وہ باہر ہی سے واپس ہوجاتی ہیں یا پھر مسجد کے باہر کے حصے میں استنجاء خانے کے پاس جو جگہ ہے وہاں وہ بیٹھ کر بیان سن کر واپس ہوجاتی ہیں۔ جس طرح شہر بنگلور کے مرکز میں جب مستورات کا جوڑ ہوتا ہے تو وہ بھی وہاں گراؤنڈ فلور میں پارکنگ کی جگہ میں جمع ہوتی ہیں اور وہاں کے بیانات سے مستفید ہوتی ہیں؟۔ واضح رہے کہ ماہانہ ایک مرتبہ مستورات کے لیے علماءِ کرام کا اصلاحی خطاب ہم نے اس لیے رکھا ہے کہ یہاں کی بعض خواتین نشے کی لت میں اس حد تک مبتلا ہو چکی تھیں کہ اپنے شوہروں اور بچوں کو چھوڑنے پر مجبور ہو گئی تھیں۔ بے حیائی کی صورتِ حال یہاں تک پہنچ چکی تھی کہ تیرہ سال کی ایک لڑکی حاملہ ہو گئی تھی۔ لہٰذا اس بگڑتی ہوئی صورتِ حال کی اصلاح اور خواتین کو دین کی طرف متوجہ کرنے کے مقصد سے ماہانہ ایک مرتبہ مستورات کے لیے اصلاحی بیان کا انتظام کیا جاتا ہے۔ جہاں یہ منکرات ہورہے ہیں وہاں مسجد کے علاوہ کوئی بڑی جگہ نہیں ہے جہاں پر مستورات آکر دین کی بات سن سکیں ۔از روئے شرع آپ جواب دے کر ممنون فرمائیں۔ فقط والسلام۔ابو عبداللہ