تسبیح استغفار اور درودشریف صبح وشام پڑھنے کا ثبوت

؍(۱) حدیثوں میں تسبیح، تحمید، تکبیر، تہلیل،صبح وشام سو سو مرتبہ پڑھنے کی ترغیب وارد ہوئی ہے،لیکن لا حول ولاقوۃ الا باللہ سو مرتبہ پڑھنے کی صراحت حدیث میں نہیں ملی ۔مگر کثرت مطلوب ہے پس جو تیسراکلمہ مشہور ہے ،اسی میں سبحان اللہ ، الحمدللہ ،لا الہ الا اللہ ، اللہ اکبر اور لا حول ولا قوۃ الا باللہ کے کلمات شامل ہیں ، چنانچہ حضرت عبداللہ بن عمرو بن العاصؓسے مروی ہے کہ نبی اکرم ﷺنے ارشاد فرمایاجو شخص سو مرتبہ صبح اور سو مرتبہ شام کو ’’سبحان اللہ‘‘ کہے، وہ سو حج (نفل)کرنے والے کی مانند ہے۔ جو آدمی صبح و شام سو سو مرتبہ ’’الحمد للہ‘‘ کہے، وہ اس شخص کی طرح ہے، جس نے اللہ تعالیٰ کے راستے میں سو مجاہدوں کو گھوڑوں کی سواری دی یا فرمایا وہ سو غزوات لڑنے والے مجاہد کی طرح ہے، جو شخص صبح و شام سو سو مرتبہ ’’لا الہ الا اللہ‘‘ کہے، وہ اس آدمی کی طرح ہے، جس نے حضرت اسماعیل علیہ السلام کی اولاد کے سو غلام آزاد کیے اور جس نے صبح و شام سو سو مرتبہ ’’اللہ اکبر‘‘ کہا تو اس دن اس سے اچھا عمل کسی نے نہیں کیا، البتہ وہ شخص جو یہ کلمات اسی طرح کہے یا اس سے زائد بار کہے ۔ (جامع ترمذی: حدیث نمبر: ۳۴۷۱)نبی کریم ﷺ نے فرمایا لاحول ولا قوۃ الا باللہ کثرت سے پڑھا کرو، یہ جنت کے خزانوں میں سے ایک خزانہ ہے۔(مسند احمد، رقم الحدیث: ۸۴۰۶) حضور اقدس ﷺ کا ارشاد ہے کہ جو شخص ہرنماز کے بعد سبحان اللہ ۳۳ مرتبہ ،الحمد للہ ،۳۳ مرتبہ ،اللہ اکبر ۳۳ مرتبہ اور ایک مرتبہ لا الہ الا اللہ وحدہ لاشریک لہ لہ الملک ولہ الحمد وہو علی کل شیئ قدیرپڑھے اس کے گناہ معاف ہوجاتے ہیںخواہ گناہ سمند رکے جھاگ کے برابر ہوں ۔اس حدیث کی تشریح میں حضرت شیخ الحدیث مولانا محمد زکریاصاحب رحمہ اللہ نے تحریر فرمایا ہے کہ اس حدیث میں تین کلمے (تسبیح ،تحمید ،تہلیل ) ۳۳ مرتبہ اور لا الہ الا اللہ ایک مرتبہ وارد ہوا ہے اور اس سے اگلی حدیث میں دو کلمے ۳۳ مرتبہ اور اللہ اکبر ۳۴ مرتبہ آرہا ہے ۔ حضرت زید ؓ سے نقل کیا گیا ہے کہ ہم کو حضوراقدس ﷺنے سبحان اللہ ، الحمد للہ ، اللہ اکبر ہرایک کو ۳۳ مرتبہ ہر نماز کے بعد پڑھنے کا حکم فرمایا تھا، ایک انصاری نے خواب میں دیکھا کوئی شخص کہتا ہے کہ ہر ایک کلمہ کو ۲۵مرتبہ کرلو اور ان کے ساتھ لا الہ الا اللہ ۲۵مرتبہ کا اضافہ کرلو، یہ خواب حضورﷺ سے عرض کیا گیا تو حضور ﷺ نے قبول فرمالیا اور اس کی اجازت فرمادی کہ ایسا ہی کرلیا جائے ۔ اور ایک حدیث میں سبحان اللہ ،الحمد للہ ،اللہ اکبر ، ہر کلمہ کو نماز کے بعد ۱۱مرتبہ پڑھنےکا حکم ہے اور ایک حدیث میں۱۰،۱۰مرتبہ وارد ہوا  ہے ۔ ایک حدیث میں لا الہ الا اللہ ۱۰ مرتبہ باقی تینوں کلمے ۳۳ مرتبہ ۔ ایک حدیث میں ہر نماز کے بعد چاروں کلمے ۱۰۰ ،۱۰۰مرتبہ وارد ہوئے ہیں جیساکہ حصنِ حصین میں ان روایات کو ذکر کیا گیا ہے ۔ یہ اختلاف بظاہر حالات کے اختلاف کی وجہ سے ہے کہ آدمی فراغت اور مشاغل کے اعتبار سے مختلف ہیں جو لوگ دوسرے ضروری کاموں میں مشغول ہیں ان کے لیے کم مقدار تجویز فرمائی اور جولوگ فارغ ہیں ان کے لیے زیادہ مقدار ۔ لیکن محققین کی رائے یہ ہے کہ جو عدد احادیث میں مذکور ہیں ان کی رعایت ضروری ہے کہ جو چیز دواکے طور پر استعمال ہوتی ہے اس میں مقدار کی رعایت بھی اہم ہے ۔( فضائل اعمال میں فضائلِ ذکر ص ۴۶۳)