بتیس صفحات والے اس مختصر مگر جامع قاعدہ کو بڑے حضرت ؒ نے دو حصوں میں تقسیم فرمایا ہے ۔ پہلا حصہ مفردات (حروف تہجی کی شناخت ) سے متعلق ہے ، بڑے حضرت ؒ نے تدریس سے متعلق ہدایت میں لکھ دیا ہے کہ استاد کو چاہیے کہ ہر سبق بچہ سے لکھوائے ، جب تک بچہ اپنے سبق کو اچھی طرح لکھنے پڑھنے اور سمجھنے پر قادر نہ ہوجائے ہرگز دوسرا سبق شروع نہ کرے ۔

حضرت کی اس ہدایت کو ملحوظ رکھا جائے تو مفردات کی ترتیب اس قدر آسان اور دلنشیں ہے کہ بچہ ایک سبق پڑھنے کے بعد دوسرا سبق استاد کے بتانے سے پہلے پڑھنے لگتا ہے ،حضرت نے ترتیب کچھ یوں قائم کی ہے کہ سب سے پہلے حروف تہجی ترتیب کے ساتھ ، پھر حروف تہجی کو بلاترتیب ذکرکیا ہے ، اس کے بعد حروف منقوطہ کی نشاندہی الگ کی گئی پھر حروف مہملہ کو بیان کیا گیا ہے ۔ اس ترتیب کو شاید ہی حضرت سے پہلے کسی نے سوچا ہو ۔اس کا فائدہ یہ ہے کہ بچوںکے ذہن میںالفاظ کی شناخت خوب اچھے طریقے سے بیٹھ جاتی ہے اور وہ اس لفظ کو پورے قرآن مجید میںکہیں بھی لکھا ہوا پاتا ہے تو فوراً پہچان لیتا ہے ۔

اس کے بعد بڑے حضرت ؒ نے حسن ترتیب سے حرکات ، سکون ، تشدید ، مد ، حرکات اشباعی ، تنوین کو بیان کیا ہے ۔ حضرتؒ کا یہ انداز واقعی نرالاہے اور بچوں کے نازک ذہن کے لئے بالکل موزوں بھی ۔ قواعد لکھ کر کتاب کو بوجھل نہیں کیا گیا بلکہ یہ کام استاذ کے سپرد ہے کہ وہ تمام قواعد کو اپنی زبان سے ادا کرکے بچے کو سمجھائے ، اسی طرح مخارجِ حروف اور صفات بھی استاذ کے ذمہ ہیں کہ وہ تلفظ کرکے بچوں کو سمجھائے۔ 

باب القرآن کے دوسرے حصے میں ملے جلے حروف یعنی مرکبات کا تعارف کیا گیاہے ، حضرت ؒ نے تمام مرکبات قرآن مجید سے اخذ کیے ہیں۔ باب القرآن سے پہلے کسی قاعدہ کی کتاب میں اتنی کثرت سے الفاظ قرآنی منقول نہیں تھے ۔ بڑے حضرت ؒ نے خود لکھا ہے ’’ چونکہ اس قاعدہ میں پارۂ عم کے سیکڑوں الفاظ آگئے ہیں اس لئے اس کے ختم کر لینے کے بعد پارۂ عم شروع کرادیں تو بچے نہایت شو ق اور آسانی کے ساتھ پارۂ عم پڑھ لیں گے اور اس تدریجی طرزِ تعلیم سے باقی قرآن مجید کا پڑھنا بھی آسان ہوجائے گا ‘‘۔ 

راقم الحروف کا ذاتی تجربہ ہے کہ بچے دوسری کتابوں کی بہ نسبت باب القرآن کے ذریعے سے قرآن بہت جلد پڑھنا سیکھ لیتے ہیں ۔ جسے دیکھ کر یہ محسوس ہوتا ہے کہ بڑے حضرت ؒ کی یہ کاوش محض کسبی نہیں بلکہ وہبی ہے ۔ سچ ہے کہ اللہ تبارک وتعالی اپنے برگزیدہ بندوں کے دل میں قرآن مجید کی تعلیم کا انوکھا انداز ودیعت فرماتے ہیں ۔ یہ اللہ کی عطا ہے اور بڑے حضرت ؒ کی کرامت ۔

اس کے برعکس آج کل دیکھا جارہا ہے کہ بچوں کو الفاظ کی شناخت کے بجائے الفاظ رَٹانے پر زور دیا جارہا ہے ۔ کم سن طلبہ طوطے کی طرح سبق رٹ لیتے ہیں، بعدمیں الفاظ کی شناخت سے عاری رہتے ہیں ، جس کا خمیازہ یہ بھگتنا پڑتا ہے کہ اگر ان بچوں کو ان کی نصابی کتاب کا کوئی سبق سنانے کہا جائے تو وہ فرفر سنادیںگے ، لیکن قرآن مجید درمیان سے کھول کر کہیں سے پڑھنے کہا جائے تو بہت اٹک اٹک کر پڑھیں گے ۔ یہ در اصل حروف کی شناخت ٹھیک طورپر نہ ہونے کی وجہ سے ہے ۔ 

بہتر ہوگا کہ مکاتب کے ذمہ دار مسئلہ کی جڑ کو سمجھیں ، احساس کریں کہ کیوں ہمارے مکاتب میں کئی کئی سال پڑھنے کے باوجود طلبہ قرآن مجید ٹھیک طریقے سے پڑھ نہیں پاتے ۔ذمہ داروں کو چاہئے کہ اپنے مکاتب میں باب القرآن کو داخلِ نصاب کریں تاکہ بچوں کو کم مدت میں قرآن ٹھیک ٹھیک پڑھنا آجائے اور ان کی عمر ضائع نہ ہو۔ 

بالخصوص بچیوں کے مکاتب میں تو یہ چیز لازمی ہے اس لئے کہ بچی کو کم عمری میں ناظرہ پڑھنے کے قابل بنانا از حد ضروری ہوتا ہے ، عمر بڑی ہونے کے بعد بچیاں مکاتب نہیں آسکتیں اور گھروں میں بھی دینی ماحول نہ ہونے کی وجہ سے وہ قرآن مجید کی بنیادی تعلیم سے زندگی بھرکے لئے محروم ہوجاتی ہیں اور آگے چل کر اپنے اولاد کوقرآن سکھانے کے قابل نہیں ہوتیں۔ ذمہ دارانِ مکاتب غور فرمائیں۔ 

اللہ تعالیٰ ہمیں باب القرآن کی اہمیت کو سمجھتےہوئے اس مبارک قاعدے سے فائدہ اٹھانے کی توفیق عطا فرمائے، بالخصوص بچوں اور بچیوں کو اس بابرکت قاعدے سے خوب استفادے کی توفیق بخشے ، مکاتب کے اساتذہ اور علماء کرام سے درخواست ہے کہ اس قاعدے کے اہمیت کو محسوس کرتے ہوئے اس جانب خاص توجہ مبذول فرمائیں۔ 

یہ خبر نہایت مسرت خیز ہے کہ دارالعلوم سبیل الرشاد بنگلور میں حضرت امیر شریعت مولانا صغیر احمدصاحب رشادی دامت برکاتہم نے شہر بنگلور کے متعدد رشادی ائمہ کو مورخہ ۱۵ ذی قعدہ ۱۴۴۳ھ بروز جمعرات جمع فرمایا اور باب القرآن کی اہمیت پر روشنی ڈالتے ہوئے مکاتب میں باب القرآن  شروع کرنے کی ترغیب دی۔ امیر شریعت کی آواز پر لبیک کہتے ہوئے بیسیوں ذمہ دارانِ مکاتب نے اپنے یہاں’ باب القرآن ‘کی تعلیم شروع کردی ہے اورالحمد للہ روز افزوں اس میں اضافہ ہورہا ہے ، انشاء اللہ آئندہ دنوں میں اس مفید اور بر وقت اقدام کے اچھے ثمرات ونتائج ظاہر ہوں گے ۔