یعنی جب آدمی صبح اٹھتا ہے تو تمام اعضائے بدن زبان کی طرف متوجہ ہوتے ہیں اور کہتے ہیں کہ اے زبان تو ہمارے سلسلے میں اللہ سے ڈر ، ہم تجھ سے متعلق ہیں ، اگر تو سیدھی رہے گی تو ہم سیدھے رہیں گے اور اگر تو تیڑھی ہوگئی تو ہم بھی تیڑھے ہوجائیں گے ،مطلب یہ ہے کہ انسان کا سارا جسم زبان کے تابع ہوتا ہے ، اگر زبان غلط ہوجائے تو جسم کے سارے اعضاء متاثر ہوتے ہیں ۔ زبان کی لغزش پاؤں کی لغزش سے زیادہ خطرناک ہوتی ہے ، پاؤں پھسل جائے تو آدمی دوبارہ کھڑا ہوسکتا ہے ، لیکن زبان سے کوئی غلط بات نکل جائے تو پھر اسے واپس لینا آدمی کے اختیار میں نہیں رہتا ۔ یہی وجہ ہے کہ صحابہ کرام زبان کی حفاظت کا خاص اہتمام فرمایا کرتے تھے ۔ 

موطا امام مالکؒ میں ہے کہ حضرت عمرؓ حضرت ابوبکر ؓ کے پاس تشریف لائے ، صدیقِ اکبرؓ اپنی زبان کو پکڑ کر مروڑ رہے تھے ، حضرت عمرؓ نے فرمایا: ’ ’ اللہ آپ کو بخشے ، اپنی زبان کو چھوڑ دیجئے ، صدیقِ اکبرؓ نے فرمایا: ’’ اس زبان نے مجھے بڑی ہلاکتوں میں ڈال رکھا ہے ‘‘۔