’’ایسا معلوم ہوتا ہے کہ جیسے صرف نام لینا رہ گیا ویڈیو اور ٹی وی کا، قرآن تو عربی زبان میں ہے ، اس میں انگریزی کا لفظ کیسے آتا ، عقل کی بات نہیں تھی، لیکن قرآن کا اعجاز معلوم ہوتا ہے کہ آج سے چودہ سو برس پہلے جو کتاب نکلی ، اگر میں مسجد میں بیٹھ کر کہوں کہ اس میں ٹی وی اور ویڈیو کا ذکر ہے تو میں غلط نہیں کہوں گا اس لئے کہ قرآن میں کہا گیا  من یشتری لھو الحدیث   جو لوگ عربی کی بلاغت سے واقف ہیں اور اس کی زبان کا صحیح ذوق رکھتے ہیں اہل زبان کی طرح ، اور محض اللہ کا شکر وانعام ہے کہ ہمیں اسی حجا ز و یمن کا فیض پہنچا ہےکہ ہم اس قابل ہوئے ، ہمارے استاذ عرب تھے ، ہم نے ساری عربی عربوں سے پڑھی الحمد للہ ! تو ہم ’’ لھو الحدیث‘‘ کالطف لے رہے ہیں ، ہمارا عربی کا ذوق لھو الحدیث کے دائرے کی وسعت کو دیکھ رہا ہے ، میں اس لفظ کا ترجمہ نہیں کرسکتا، حالانکہ لکھنو کا رہنے والا ہوں ، میں اقرار کرتا ہوں کہ میں ’’ لھو الحدیث ‘‘ کے ترجمہ کا حق ادا نہیں کرسکتا۔ اس کے معنی ہیں باتوں کاکھیل ، اب بتائیے – ریڈیو اور ویڈیو وغیرہ میں کیا ہے ، اگر یہ ہوتا کہ بہت سے لوگ ہیں جو کھیل کو پسند کرتے ہیں ، کھیل خریدتے ہیں تو اس میں ریڈیو اور ٹی وی نہ آتا – مگر باتوں کا کھیل کہا گیا یہ وہ ہے جو میں دعویٰ سے کہہ سکتا ہوں کہ قرنِ اول، قرنِ ثانی ، قرنِ ثالث ، قرنِ رابع اور پانچویں ، چھٹی ، ساتویں ، آٹھویں ، یہاں تک کہ میں کہوں شیخ الاسلام ابن تیمیہ ؓ کا ذہن بھی یہاں تک نہیں گیا ہوگا (یعنی ویڈیو اور ٹی وی کی طرف) یہ قرآن کا معجزہ ہے ، حدیث کا لہو ، باتوں کا کھیل اور وہ کیا ہے ، یہ ویڈیو کا پروگرام ،ٹی وی کی بولتی تصویریں ، یہ ویڈیو ، یہ رکارڈ جو سنے جاتے ہیں ، سب   ’’ لھو الحدیث ‘‘ ہیں، آج سے چودہ سو برس پہلے جب یہ سب چیزیں ایجاد ہونا تو در کنار ، کسی نے خواب میں بھی نہیں دیکھا تھا، اس وقت کوئی تصور بھی نہیں کرسکتا تھا ، اس وقت اللہ کی کتاب نے کہہ دیا ، بہت سے لوگ ہیں جو ’’ لھو الحدیث ‘‘ خریدتے ہیں ۔

میرے عزیزو! آپ کو کم از کم اپنے گھروں کی حفاظت کرنی چاہئے اور یہ سمجھنا چاہئے کہ عقائد میں بھی ہم کو پورا مسلمان ہونا چاہئے ، عبادات میں بھی پورا مسلمان ہونا چاہئے ‘‘۔ 

[ویڈیو اور ٹی وی باتوں کا کھیل ۔ مولانا ابوالحسن علی ندویؒ ۔ ص:۱۴، ۱۵]