’’ا بھی مدرسے کے قیام کو دو سال سے کچھ زیادہ کا عرصہ گذرا ہے لیکن اس مختصر مدت میں بفضلہ تعالی مدرسے کے جملہ شعبوں نے ترقی کی ہے ، جس کی تفصیل کی اس مختصر تحریر میں گنجائش نہیں ہے ، مولانا مخدوم کو معاون اور کارکن بھی اللہ تعالی نے ایسے ہی عطا فرما دیے ہیں جو موصوف کے ساتھ پورا تعاون فرمارہے ہیں ، اللہ تعالیٰ معاونین اور کارکنوں کو جزائے خیر عطا فرمائے ، آمین۔ احقر نے اپنے زمانہ طالبعلمی میں حضرت مولانا شبیر احمد عثمانی کی ایک تقریر دینی مدرسے کے سلسلے میں سنی تھی، اس میں مولانا علیہ الرحمہ نے فرمایا تھا اگر چٹھی رساں یعنی پوسٹ میان جس وقت اپنی ڈیوٹی پر ہوتے ڈاک تقسیم کرتا ہے اگر اس کے فرض منصبی کی ادائیگی میں کوئی شخص مداخلت کرے اور روڑے اٹکائے تو گورنمنٹ مدعی ہو کر مداخلت اور رکاوٹ ڈالنے والے کو سزا دیتی ہے، اسی طرح وہ ڈاک یعنی اپنا خط جو پروردگار عالم نے حضرت محمد صلی اللہ علیہ وسلم جیسی عظیم الشان شخصیت کے ذریعے ہم تک پہنچایا ہے، اس کی حفاظت جو حضرات کر رہے ہیں ، اگر خلوص کے ساتھ اپنے فرضِ منصبی میں لگے ہوئے ہیں اس کی مخالفت کرنے والوں کو پروردگار عالم سزا دے گا ، ایسے لوگوں کا انجامِ کار خسران ہی ہوگا۔